e shtunë, 14 korrik 2007

تقرير عن حفلة منير

الاوبرا ستظل هى افضل مكان لغنى منير المكان مفتوح و يحتضن الالاف و تجهيزات الصوت متميزة و الاضاءة و خروج الدخان والورق وفقاعات الصابون بجد الاوبرا بتعمل حاجات حلوة جدا و تجهيزات جيدة للحفلات فاولا بدى تحية للمكان اللى لما اروح لمنير مروحش ليه غير هناك وهو نفسه ده اعز مكان يغنى فيه بالنسباله

منير عمل حفلة جامدة جدا بجد و ما زال صوته بالقوة والتأثير والاحساس لم يتغير و طبعا متغيرش فى المواعيد المتأخرة كمان يعنى كعادته الحفلة الساعة 9 لكن هو طلع 11 و نص و ده المعتاد منه والجماهير بتتعب و بتزهأ لحد ما يطلع بتنسى كل حاجة و تغفرله اى حاجة

الدخلة كانت باغنية هيلا هيلا
الكون بيدور
علمونى عنيكى
عصفور (اول مرة الاقاه يغنيها فى حفلة وكانت جامدة جدا و كان بينسى كوبليهات عشان كده كان حاطط ورق عشان يبص فيفتكر و فى الوقت المناسب فمكنش فى لخبطة)

لما النسيم
حتى حتى
الجيرة والعشرة
بالحظ والصدف
وسط الدايرة
يا عندية
من اول لمسة (قبل دى كانت منير عرف ان مى كساب موجودة فناداها و طلعت تحيي منير و قالت هتغنى معاه دى و غنتها وكانت كويسة ولاقت تحية مقبولة)

على صوتك (قبل دى بقى نادى منير على تامر حسنى اللى كان جاى يحضر هو كمان و طلع قال كلام برضه عن منير وانه هرم رابع لمصر و كلام كده و منير قعد يتكلم عن الجيش اللى دخله زمان هو وعلى الحجار و كام حد تانى ايامها وقال انهم شرفوا الجيش وادوا خدمتهم وساعتها تامر كان محرج كده وقال حاجة كده زى كلامك على راسى يامنير بس مش فاكر قال ايه بالظبط فعلا و اتوجه للجمهور وقال محدش يصدق كلام التلفزيون و الاعلام اما عن ردود افعال الجمهور هقولها فى الاخر والاغنية اتغنت منهم هما التلاتة)

قلبى مساكن شعبية ( فى الاغنية دى كانت مى واقفة معهاش ميك ومغنتش وكان اللى بيغنى منير وتامر و هما الاتنين مع بعض ده خلى تامر صوته مطلعش ادام منير و حسيت كأن منير بس اللى بيغنيها وبعدها حيوا هما الاتنين منير ومشيوا)
شيكولاتة
عشق البنات
الدنيا ريشة فى هوا / اشكى لمين ( ودى كانت الختام كعادته يحب يختم بيهم) الحفلة كانت ساعتين بالظبط
تقريبا انا ناسى اغنية واحدة كمان !!

بالنسبة للفرقة فمنير زى ما قال ان فرقتى و العازفين احسن فرقة فى مصر ففعلا هما محترفين جدا و احسن فرقة بلا استثناء لواحد فيهم

الجمهور دايما بحاول يكون رأيي ان منير جمهوره ذكى و واعى وانه مختلف لكنى بقيت بحس ان لا كمان فى جمهور عنده غباء عظيم و ده لانه طافح على الشعب اصلا كتير
فالامثلة كتير سواء قبل طلوع منير او بعد ما طلع
فمثلا قبل طلوعه هتلاقى ناس بيشتموا و بيغلسوا اوى على ناس و نزاعات عشان ناس تطلع قدام و كده و يقوموا ملمحين بشتايم اللى بشتمك بس متقدرش تقول ان بشتمك انت (طبعا انا مليش علاقة بالموضوع انا متابع من بعيد بس)
و ممكن بعدها يشتموا منير باباحة اكمنه اتأخر و حاجات تانية كتير

اما وهو موجود بقى فمنير كان حب ينبه للناس انه عايزهم يعيشوا الحفلة و يسيبوهم من الموبيلات والتسجيلات دى عايزهم يعيشوا معاه هو وفرقته تقوم تلاقى رد الفعل ولا حياه لمن تنادى هما هما لا نزلوا الموبيلات ولا بطلوا تصوير لا وكمان تلاقى فى زيادة فى طلوع الموبيلات!!

كان فى بنتين كمان كانوا بيطلعوا يقعدوا على كتاف شباب كده عشان منير يشوفهم ويصوتوا وينادوه يا منير رد فعل الجمهور حواليهم خاصة واحد ربنا ياخده كان بيقول يديكى وي.... مفيش داعى اقولها فى المدونة دى بس انتو هتفهموها هى زى يديكى بس بالاباحة

و لما نادى على مى كساب و بعدها تامر و مع طلوعه بقى انا عن نفسى كنت اتأرفت لانى بكرهه جدا لكن خلاص ده واحد جاى لمنير عشان يسمعه و منير عرف فطلعه فلازم نحييه لكن بقى تلاقى كتير دخلوا بشتايم ابيحة و شوية قالوا انزل بس غالبا الكلام ده موصلش لمنير او تامر او يمكن وصل ونفضوا يعنى و كان فى شوية برضه زيى كده اللى هو خلاص مش مشكلة ده ضيف لمنير يعنى

طبعا بالنسبة للحشيش فهو دائما حاضر بقوة فى الحفلات المنيرية و ما اكثر الحشاشين

فى النهاية الحفلة كانت جامدة ومنير عالى اوى و هيفضل الجمهور المعفن معفن و زبالة و الجمهور اللى بيفهم وكويس برضه موجود بس قليل اوى

----------------------
متنسوش البوستين اللى حاططهم تهامى تحت دول شوفوهم معلش بس كان لازم اكتب عن الحفلة


10 komente:

boshra mohamed tha...

تقرير جميل ومختصر يامحمد
اتفق معك فى نفطة ان الاوبرا يظل هو المكان الافضل الذى يؤدى فيه منير دائما والاوبرا ايضا ايقنت ذلك تماما وهذا يتضح جيدا من تجهيزات المسرح التى تخرج مرة بعد مرة فى صورة افضل
مستوى الحفلة بصورة عامة جاء مــُرضى لى شخصيا وكان من الممكن ان اصنفها على انها حفلة من حفلات منير الممتازة لولا الاختين الحلوين تامر وشوقية قصدى تامر ومى اللى اخدوا من الحفلة اكتر مما ادوها وياريت حفلات منير كلها فى الاوبرا تبقى راس سنة عشان مايقعدش يدوشنا بضيوفه
عصفور واشكى لمين ولما النسيم وياعندية وعلمونى وابدع فيهم منير واخرجهم هو والفرقة بشكل ممتاز
بقية الاغانى كان فيها بعض النقاط السلبية ولكن روح منير وتفاعل الجمهور
كان لهم اكبر الاثر فى تغطية هذه الجوانب
الجمهو كان عدده كبير كعادة حفلات منير فى الاوبرا دائما ولكنه لم يكن ذلك العدد الذى لم ارى مثله فى حياتى والذى احس به كل من حضر حفلة راس السنة الماضية .. ولكن الاهم من الكثرة او القلة تتمثل فى ان هذا الجمهور جمهور منيريان مائة بالمائة وهذا مايعطى الحفلة مفعول السحر
اللافت للنظر ان جمهور منير من الفتيات اصبح عدده كبير جدا والاهم انه ذو وعى كبير وهذا استشفيته من التعليقات التى التقطتها اذنى على احداث معينة من الحفلة
اداء الفرقة خلال الصولهات الفردية لم يكن فيه ذلك الابداع الذى يفاجانا به العازفين على الدوام وجاء مخيبا للامال وخصوصا من عازف الدرامز الاكثر من رائع حازم
فى النهاية لايسعنى سوى القول بأن الحفلة للذى حضرها مرت بسلام ولاتجعلنى اقول للذى لم يحضرها ... فاتك كتير

nohamy tha...

كان نفسي أحضر الحلفة بس الظروف ما سعدتنيش
المهم تقريرك حلو يا محمد

heba tha...

وصفك للحفلة خلاني زي مااكون كنت هناك بجد رائع وشكراً يا محمد
اكيد الإحساس هناك حاجة تانية خالص

انا برده مش من معجبي تامر حسني بس على رأيك ضيف جه يسمع منير يبقى ضيفنا احنا كمان

على فكرة مقولتليش اغاني الألبوم الجديد ايه ؟
وحاجة كمان هو ليه منير مغناش من الألبوم الجديد في الحفلة ؟ لأنك مقولتش اسم اغنية جديدة غناها يعني

سلام

بييبو tha...

الله يا بختك كنت هناك كنت هاموت واروح الحفلة دى بس يلا بق مفيش نصيب
موضوع جميل حسسنى انى كنت هناك مع منير والمزيكا
تحياتى

حسن ارابيسك tha...

الحقيقة كفيت ووفيت على التقرير الرائع ده

بالمناسبة
أو حفلة لمنير كانت بعد شريطه الثاني بنتولد وكانت الحفلة في مسرح سيد درويش بالهرم
وكانت الحفلة على ما أذكرعام 78 أو 79
وكان بروجرام الحفلة كالآتي
فرقة جاما وهي كوكتيل من شباب مصري وغربي وكانوا بيقدموا أغاني مشهورة جداً في ذلك الوقت عشان كده كان في أجانب كتير في الحفلة

بعد فرقة جاما كان سمير الإسكندراني
وغنى أغانيه الجديدة التي رجع لنا وقتها بثوب جديد وكانت أغانيه من إنتاج شركة سونار على شرائط إسلام نفس الشركة المنتجه لمنير في ذاك الوقت

بعد كده منير وقبل وصلة منير وإحنا في الإسطوانه جه منير في الإستراحه وقعد يضحك ويتكلم معانا وكان لابس كاب دعايه لشركة روثمن كان واخد عليه مائه وخمسون جنيه تخيلوا

المهم غنى منير أغاني البومه الأول والثاني بنتولد وكان ده أول ظهور لمنير وكانت حفله محترمه جداً وشيك قوى بصرف النظر عن إمكانيات الشو اليومين دول الكلام ده كان

Anonim tha...

محمد منير أكتر مغني مصري عنده شعبية عندنا في السودان و كتير من السودانيين بيحبوه لتبنيه للعديد من أغانينا زي وسط الدايرةـ مساكن شعبية اللي اسمها الأصلي بطاقة شخصية ـ حكايته حكاية ـ حرمت الحب و الريدة ـ و الكون بيدور و هي تعريب لأغنية نوبية حلفاية. لكن البعض يعيب عليه إنو أحيانا لا يذكر الفنانين الأصليين. عموما حفلته الأخيرة في السودان نجحت نجاح فظيع حتى بعد غيابه عشرين سنة عن السودان

حدوته مصرية tha...

بحب السيما
اشكرك على تعليقك اللى يعتبر اضافة وفعلا البنات زادت لكن لسه مش كتير برضه

تهامى
اشكرك يا تهامى و تحياتى

شمس
سعيد ان قدرت اوصل بعض من احساس الحفلة واغانى الالبوم فى البوست الجاى اهو هكتبه

بيبووووووووو
اشكرك بجد مبسوط انى بوصل بعض من احساس الحفلة

حسن ارابيسك
اضافتك دايما مكسب لينا بمعلومات مكناش نعرفها تماما واتمنى دخولك معانا المدونة تمدنا بمعلوماتك فى بوستات

دينا
اشكرك و جمهور منير فى كل حتة كتيير لانه رائع و هو بيقول ان الاغانى دى بياخدها من التراث وانها قديمة بس يبقى تقديم منير المختلف لها

ALiaa tha...

http://www.youtube.com/watch?v=6p2i203QfZQ


http://www.youtube.com/watch?v=UfWyT0qrHFk


http://www.youtube.com/watch?v=EikdSbXYduE

http://www.youtube.com/watch?v=E6FD42kGcgk

Zika tha...

أنا مرحتش الحفله بس انت تقريرك تقريبا حكي كل اللي اتحكالي عن الحفله من الناس صحابي اللي راحت الحفله
تقرير جامد
انا هعلق علي نقطتين اول حاجه بالنسبه للجمهور
فده باه شئ طبيعي في المصريين عامة والله حتي لو جمهور مين
تاني حاجه بالنسبه للحشيش دي بقي اللي نفسي افهمها ايه علاقة منير بالحشيش دايما في حفلاته تلاقي حشيش ولو بيعمل حفلة في مدينة ساحلية وخاصة اسكندرية بتزود علي الحشيش الخمره ايه العلاقه مش فاهم
مدنوة تحفة
تحياتي ليك ولفريق العمل

Anonim tha...

سعيده بوجودي هنا اولا ، بعدين احب اقول ان محمود رضوان ليه ديوان في المكتبه للمجلس الاعلى للثقافه في الاوبرا لو حد حب يشتري كمان هو بيعمل امسيات شعر في الساقيه ومصاحب ليه موسيقى كان ده في رمضان و حتتكرر ان شاء الله الشهر اللي جي ديوانه اسمه نضارة نظر و مدونته دي http://elsha3erradwan.maktoobblog.com/